Туркийн цагдаа нар Истанбул хотын захирагчийг авлига, терроризмтой холбоотой байж болзошгүй хэмээн мөрдөн байцаалтын хүрээнд баривчилжээ.

Ерөнхийлөгч Режеп Тайип Эрдоганы гол өрсөлдөгч Экрем Имамоглу лхагва гарагийн өглөө баривчлагдсан бөгөөд прокурорууд хотын дарга болон бусад 100 орчим хүнийг баривчлах захирамж гаргасан гэж төрийн мэдлийн “Анадолу” агентлагаас мэдээлэв.

Имамоглу “Бид асар их дарангуйлалтай тулгарч байна. Гэхдээ би сэтгэлээр унахгүй гэдгийг та бүхэн мэдээсэй гэж хүсч байна” гэсэн видео нийтэлжээ. Тэрээр Засгийн газрыг ард түмний хүсэл зоригийг булаан авсан гэж буруутгав.

Эрх баригчид Имамоглугийн баривчилгааны дараа эсэргүүцлийн жагсаал гарахаас сэргийлэн Истанбулын хэд хэдэн замыг хааж, хотод дөрвөн өдрийн хугацаанд жагсаал цуглаан хийхийг хориглосон боловч 100 орчим хүн цагдаагийн газарт цуглаж, засгийн газрын эсрэг уриа лоозон барьжээ. Истанбулын их сургуулийн оюутнууд лхагва гаригт болсон жагсаалын үеэр цагдаагийн хаалтуудыг эвдсэн бөгөөд цагдаа нар нулимс асгаруулагч хий ашигласан гэж орон нутгийн хэвлэлүүд мэдээллээ.

Имамоглу 2019 оны 3 дугаар сард Туркийн хамгийн том хот болох Истанбулын хотын захирагчаар сонгогдсон нь Эрдоган болон түүний “Шударга ёс, хөгжлийн нам” (AK Party)-д томоохон цохилт болж, 25 жилийн турш тус хотыг удирдаж байсан эрх баригчдын ноёрхлыг тасалсан үйл явдалд тооцогдож байгаа. “Шударга ёс, хөгжлийн нам”  нам 16 сая хүн амтай хотын сонгуулийн дүнг хүчингүй болгохоор зүтгэж байхад хэдэн сарын дараа болсон дахин сонгуулиар Имамоглу мөн ялалт байгуулжээ. Имамоглу өнгөрсөн онд болсон орон нутгийн сонгуулийн дараа өөрийн суудлаа хадгалж үлдсэний зэрэгцээ түүний Бүгд найрамдах нам “Шударга ёс, хөгжлийн нам” намыг ялсан юм. Гэсэн хэдий ч AK нам улсын хэмжээнд давамгайлсан ялалт байгуулж, үүний улмаас Бүгд найрамдах нам дотооддоо зөрчилдөх болжээ.

Мягмар гарагт Истанбул дахь их сургуулиас Имамоглугийн дипломыг хүчингүй болгосон нь түүнийг дараагийн Ерөнхийлөгчийн сонгуульд өрсөлдөх боломжийг хаажээ. Их сургуулийн зэрэгтэй байх нь сонгуульд нэр дэвших хуульд заасан шаардлагын нэг юм. Имамоглу энэ шийдвэрийг эсэргүүцэн тэмцэнэ гэдгээ мэдэгдээд байна. Сөрөг хүчний голлох Бүгд найрамдах намаас ням гарагт урьдчилсан сонгууль явуулж, нэр дэвшигчээ тодруулах байсан ч санал хураалт үргэлжлэх магадлал бага байна. Туркийн дараагийн Ерөнхийлөгчийн сонгуулийн санал хураалт 2028 онд товлогдсон ч хугацаанаас нь өмнө сонгууль явуулах боломжтой.

Бүгд найрамдах намын дарга Өзгүр Өзелийн зүгээс Имамоглугийн баривчилгааг “Төрийн эргэлт” гэж буруушаагаад “Дараагийн Ерөнхийлөгчийг ард түмэн тодруулах боломжийг хааж байгаа эрх мэдэл үйлчилж байна” хэмээн мэдэгдэв. Тэрээр “Бид дараагийн Ерөнхийлөгчийнхөө эсрэг төрийн эргэлт хийхээр оролдож байна” гэжээ.

“Al Jazeera”-гийн сэтгүүлч Синем Көсөоглу Диярбакыр хотоос мэдээлэхдээ баривчлагдсан хүмүүсийн дунд нэр нөлөө бүхий сэтгүүлчид, бизнесийн төлөөлөгчид багтаж байгааг дурдав. “Сөрөг хүчний гол төлөөлөгчид энэ шийдвэрийг хууль бус хэмээн эсэргүүцэж байна” гэж тэрээр нэмж хэлсэн байна.

Харин Засгийн газрын албан тушаалтнууд шүүхийн тогтолцоо хараат бус ажилладаг гэдгийг онцолж, сөрөг хүчнийхний эсрэг хуулийн арга хэмжээ авах нь улс төрийн шалтгаантай гэсэн мэдэгдлийг няцаажээ. Хууль зүйн сайд Йылмаз Тунч сэтгүүлчдэд хэлэхдээ “Баривчилгаа нь Засгийн газартай ямар ч холбоогүй. Хууль хяналтын байгууллагаас эхлүүлсэн мөрдөн байцаалтын ажиллагааг Ерөнхийлөгчтэй холбох нь зохисгүй үйлдэл” гэв. Эрдоганы олон нийттэй харилцах газраас “Гүтгэлгийн шинжтэй, утгагүй кампанит ажлаас Ерөнхийлөгчийг хамгаалсаар байх болно” гэж мэдэгджээ.

Эх сурвалж: https://www.aljazeera.com/news/2025/3/19/turkiye-police-detain-erdogan-rival-imamoglu-in-corruption-terror-probe