4 сарын 01, 2025         17

Инчон хотын ИТХ-ын хоёр гишүүнийг баривчлах тушаал

iaac

БНСУ-ын цагдаагийн байгууллагаас цахим самбар нийлүүлэх төслийн авлигын хэргийг шалгах хүрээнд Инчон хотын Иргэдийн хурлын гишүүд болон зарим албан тушаалтныг баривчлах хүсэлт гаргажээ.

Инчон хотын цагдаагийн газрын Авлига, эдийн засгийн гэмт хэрэгтэй тэмцэх хэлтсээс 2025 оны гуравдугаар сарын 25-ны өдөр мэдээлснээр, хотын Иргэдийн хурлын зөвлөлийн гишүүн А, Б болон цахим самбар нийлүүлэгч компанийн гурван албан тушаалтан нарын таван хүнийг хахууль авах, хахууль өгөх хэргээр баривчлах хүсэлт гаргажээ.

Цахим самбар үйлдвэрлэдэг компанитай холбоотой дөрвөн хүнийг дээрх хэрэгт холбодуулан шалгаж байгаа ч цагдан хорих шаардлагагүй гэж үзсэн байна.

А, Б нарыг Инчоны Боловсролын газрын цахим самбар нийлүүлэх төсөлд оролцож буй компаниудад тусалсны хариуд хахууль авсан гэж буруутгаж байгаа юм. Тус компанийн төлөөлөгч болон бусад албан тушаалтнуудыг Инчон хотын Иргэдийн хурлын хоёр гишүүнд мөнгө, үнэт зүйл өгсөн хэрэгт сэжиглэж байна.

Өнгөрсөн оны есдүгээр сард цахим самбар нийлүүлэх төслийн хүрээнд авлига авсан байж болзошгүй гэсэн гомдол цагдаагийн байгууллагад ирснээр шалгаж эхэлсэн бөгөөд хэрэг үүсэхээс өмнө дотоод мөрдөн байцаалтын ажиллагаа явуулахдаа А нарын 10 хүнийг хахуулийн хэрэгт холбогдуулан цагдан хорихгүйгээр шалгаж, гэр болон ажлын өрөөнд нь нэгжлэг хийсэн байна.

Цагдаагийн байгууллагаас “Сүүлийн зургаан сарын хугацаанд энэ холбогдох хүмүүсийг шалгах, эрэн сурвалжлах, холбоо тогтоох, хөрөнгө санхүү хянах, хураан авах зэрэг өргөн хүрээтэй мөрдөн байцаалтын ажиллагаа явууллаа. Бид зөвхөн баривчлах тогтоол гаргаснаар хэргийг хязгаарлахгүй. Цахим самбарын бизнесийг бүхэлд нь нарийвчлан шалгах болно” гэж мэдэгджээ.

Эх сурвалж: https://www.newsis.com/view/NISX20250325_0003112820

Гомдол, мэдээлэл хүлээн авах

Гомдол гаргах
ХАСХОМ гаргах
ХАСХОМ үзэх
Холбоо барих