Словени улсын Ерөнхий сайд Роберт Голоб болон Словенийн Ардчилсан намын дарга Янеж Янша

Словени улс гуравдугаар сарын 22-ны өдөр болох парламентын сонгуульд бэлтгэж байна. Санал асуулгын дүнгээр сонгуульд ялах магадлал өндөртэй нэр дэвшигч нь сөрөг хүчний Словенийн Ардчилсан намын дарга, гурван удаа Ерөнхий сайдаар ажиллаж байсан улстөрч Янеж Янша хэмээн “The Economist” сэтгүүл мэдээлжээ.

Словени улсын Ерөнхий сайд Роберт Голоб “Сонгуульд Израилаас нөлөөлөх оролдлого гаргасан гэх үндэслэлээр мөрдөн шалгалт эхлүүлнэ” гэдгээ мэдэгджээ. Ийм мэдэгдэл хийсэн нь Израилийн хөлсний тагнуулын “Black Cube” компани сонгогчдын саналд нөлөөлөх зорилгоор нууц ажиллагаа явуулсан байж болзошгүй гэх мэдээлэлтэй холбоотой юм.

Энэ хэрэг гуравдугаар сарын эхээр нийтэд ил болсон нууц бичлэгүүдтэй холбоотой. Бичлэгүүд нийтлэгдсэний дараа Янеж Яншагийн сонгуулийн үйл ажиллагаа эрчимжсэн юм. Уг бичлэгүүдэд Хууль зүйн сайд асан, нэр нөлөө бүхий хуульч, лоббич улс төрийн холбоо сүлбээ, нөлөөллийн арилжаа, нууц санхүүжилтийн талаар ярилцсан байв. Харин бичлэгт гарсан хүмүүс үүнийг үгүйсгэж, хуурамч ажлын ярилцлагаас хэсэгчлэн, зориудаар эвлүүлэн засварласан бичлэг гэж мэдэгджээ.

Энэ оны гуравдугаар сарын 16-ны өдөр Словенийн орон нутгийн “Младина” мэдээний сонинд Ерөнхий сайд Роберт Голоб “Израилын тагнуулын “Black Cube” компанийн ажилтнууд 2025 оны 12 дугаар сард Янеж Яншатай Словенийн Ардчилсан намын төв байранд уулзсан байж болзошгүй” гэж мэдээлсэн байна. Дээрх бичлэгүүдийн ард “Black Cube” компани байж магадгүй талаар дурдсан байна. Харин “Black Cube” компани энэ талаар ямар нэгэн тайлбар өгөхөөс татгалзжээ.

Эдгээр бичлэгүүд болон тэдгээрийг хэн бүтээсэн талаарх асуулт нь сонгуулийн үйл явцыг ихээхэн донсолгоод байна.

Эх сурвалж: https://telegrafi.com/en/amp/Spying-scandal-dominates-election-campaign-in-Slovenia-2676337402