Эх сурвалж: Daily Sabah/Bursa Mayor Mustafa Bozbey

Туркийн эрх баригчид Бурса хотын захирагч Мустафа Бозбейг 2026 оны гуравдугаар сарын 31-ний өдөр авлигын хэргийн мөрдөн шалгах ажиллагааны хүрээнд саатуулсан талаар албаныхан мэдээлжээ. Түүнийг бусад 54 сэжигтний хамт таван мужид зэрэг үргэлжилсэн ажиллагааны үеэр баривчилсан бөгөөд уг ажиллагаанд нийт 59 хүнийг хамруулж, дөрвөн сэжигтэн оргон зайлсан байна.

Бурса хотын Ерөнхий прокурорын газраас мэдээлснээр Бозбей нь Нилүфер дүүргийн захирагч асан Тургай Эрдем болон зарим албан тушаалтнууд барилгын төслүүдэд хууль бусаар давхрын талбайг нэмэгдүүлэх зөвшөөрөл олгож, хариуд нь хахууль авч, өөрсөддөө болон төслийн эзэмшигчдэд санхүүгийн давуу байдал бий болгосон гэж үзэж байна.

Тэднийг гэмт бүлэглэл байгуулсан, удирдсан, гэмт бүлэглэлд оролцсон, хахууль авсан, гэмт хэргээс олсон орлогыг угаасан болон хот төлөвлөлтийн зөрчил гаргасан хэрэгт холбогдуулан шалгаж байгаа бөгөөд мөрдөн шалгах ажиллагааны хүрээнд сэжигтнүүдтэй холбоотой олон арван орон сууц, аж ахуйн нэгж, бусад хаягт нэгжлэг хийжээ.

Мустафа Бозбей нь 2024 оны орон нутгийн сонгуулиар ялалт байгуулснаар сөрөг хүчний Бүгд найрамдах ардын нам Туркийн дөрөв дэх том хотыг удирдах боломжтой болсон юм. Иймээс баривчлах ажиллагаа нь зөвхөн эрүүгийн хэрэг төдийгүй улс төрийн маргаан дагуулсан үйл явдал болж, сөрөг хүчний зүгээс улс төрийн зорилготой гэж шүүмжилж байна.

 Эх сурвалж: https://www.dailysabah.com/politics/chp-mayor-for-turkiyes-bursa-detained-in-bribery-probe/news