Төрийн өмчит “1MDB” сангийн хөрөнгийг завшсан гэх хэрэгт холбогдон, шалгагдаж буй Малайзын экс ерөнхий сайд Наджиб Разакыг 25 гэмт үйлдэлд буруутган, дахин баривчилсан байна.
Тухайлбал, түүнийг албан тушаалын байдлаа урвуулан ашиглаж, төрийн өмчит “1MDB” сангийн 15,5 сая ам.доллар завшсантай холбоотой 4 үйлдэл, их хэмжээний мөнгө угаасантай холбоотой 21 үйлдэлд эрүүгийн хэрэг үүсгэн шалгажээ.
Экс ерөнхий сайд төрийн өмчит сангийн хэргээр өнгөрсөн 7-р сард баривчлагдаад удалгүй батлан даалтад гараад байсан боловч өнгөрсөн лхагва гарагт Малайз улсын Авлигын эсрэг хороо түүнийг дахин баривчилсан байна. Ийнхүү түүнийг албан тушаалаа урвуулан ашигласан, мөнгө угаасан гэх 25 гэмт үйлдэлд буруутгажээ.
Төрийн өмчит сангаас хөрөнгө завшсан гэх асуудлаар хэрэг үүсгэн 2015-2016 онд түүнийг шалгаж байсан бөгөөд уг сангийн үйл ажиллагаа явуулдаг байсан Малайз, Сингапур, Хонг Конг, АНУ, АНЭУ, Швейцарь, Люксембург, Австрали болон бусад улс орнуудын эрх бүхий байгууллагууд шалгалт явуулж байгаа юм байна.
Наджиб Разак болон түүний Засгийн газрын гишүүд, гэр бүлийн гишүүдийг хэрэгт холбогдуулан шалгаж, заримыг нь баривчилжээ. Малайз улсаас оргон зайлсан зарим хүнийг олон улсад эрэн сурвалжилж байгаа юм байна. Эрх бүхий байгууллага экс ерөнхий сайдын данснаас гүйлгээ хүлээн авсан 50 хүнийг байцаажээ.
Эх сурвалж
Аэрофлот компани авлигатай тэмцэх асуудлаар хэлэлцүүлэг зохион байгуулжээ
Аэрофлот компани бизнест тулгарч буй саад бэрхшээлүүдийн нэг болох авлигын талаар хэлэлцүүлэг зохион байгуулсан байна. Уулзалтад Ерөнхий прокурорын ажлын алба, хувийн хэвшлийн төлөөлөл, агаарын тээврийн компанийн удирдах албан тушаалтнууд оролцжээ.
Хэлэлцүүлэгт оролцсон Ерөнхий прокурорын газрын Авлигатай тэмцэх хуулийн хэрэгжилтийг хангах газрын дарга Александр Русецкий хэлэхдээ “Аэрофлот компанийн санаачилж буй энэ арга хэмжээ маш зөв хэлбэрээр явагдаж байна. ОХУ-ын Авлигатай тэмцэх хуульд олон улсын сайн туршлагыг тусгасан, өндөр түвшний бус хэдий ч ийм төрлийн арга хэмжээ зохион байгуулж, тодорхой зохион байгуулалтад оруулах шаардлагатай байна” гэжээ.
Харин Аэрофлот компанийн Хууль, өмчийн газрын дарга Владимир Александр “Уг арга хэмжээг ОХУ-ын Ерөнхийлөгчийн баталсан 2018-2020 оны Авлигатай тэмцэх үндэсний хөтөлбөрийн хүрээнд явуулж байна. Манай компани үйл ажиллагаандаа уг асуудлыг онцгойлон анхаарч ажилладаг. Хамтын ажиллагааны ил тод байдал болон санхүүгийн үйл ажиллагааг хуулийн хүрээнд явуулснаар тогтвортой байдал хангагдахаас гадна агаарын хөлгийн аюулгүй байдал хангагдана гэж бид үздэг” гэсэн байна.Төгсгөлд нь тэрээр манай компани авлигыг үл тэвчих явдлыг цаашид үргэлжүүлэн явуулж, бизнесийн хууль бус үйл ажиллагаатай тэмцэх чиглэлийн арга хэмжээг идэвхтэй, тогтмол хэрэгжүүлэх болно гэж нэмж хэлсэн байна.
