Монгол Улсын Авлигатай тэмцэх газар тус улсын боловсролын салбар дахь авлигатай тэмцэх ажлаа эрчимжүүлж байгаа гэж тус байгууллагын төлөөлөгч өнгөрсөн баасан гарагт хэлсэн байна.
“Боловсролын салбар дахь авлигатай тэмцэх эрчимжүүлсэн кампанит ажлыг саяхан явуулж эхэлсэн. Цаашид бид илүү их хичээл зүтгэл гарган ажиллаж, энэ салбар дахь авлигыг бүрэн байхгүй болгоно” гэж АТГ-ын урьдчилан сэргийлэх, соён гэгээрүүлэх хэлтсийн дарга Түвшинсайханы Баярхүү сар бүр хийдэг хэвлэлийн хурал дээр хэлжээ.
Энэ кампанит ажлын хүрээнд хоёр долоо хоногийн өмнө хүүхдээ сургуульд оруулах гэсэн эцэг эхчүүдээс Улаанбаатар хотын Нэгдүгээр сургуулийн захирал Гэндэнжамцын Бум-Эрдэнэ хахууль авч байхад нь баривчилсан гэж тус байгууллагаас мэдээлжээ. Нэгдүгээр сургууль нь Монгол Улсад хамгийн нэр хүндтэй сургуулиудын нэг юм байна.
Бум-Эрдэнийг баривчилснаас долоо хоногийн дараа АТГ бас нэгэн нэр хүндтэй Шинэ эхлэл олон улсын дунд сургуулийн захирлыг хахууль авч байхад нь баривчилжээ. Улаанбаатар хотын хүн ам их учраас хүүхдээ нэр хүндтэй сургуульд оруулах тийм ч амаргүй байдаг байна. 2017 оны сүүлийн байдлаар Монгол улсын 3 сая хүн амын тал нь Улаанбаатар хотод амьдардаг болжээ.
Авлигатай тэмцэх чиг үүргийг Авлигатай тэмцэх газар хэрэгжүүлдэг юм байна.
Эх сурвалж
ЕАБХАБ Армени улсын авлигын эсрэг хөтөлбөрийн хэрэгжилтэд дэмжлэг үзүүлэхэд бэлэн
Энэ оны 10-р сарын 18-19-ний өдрүүдэд Армени улсын Хууль зүйн дэд сайд Сурэн Крмоян Вена хотод зочилж, Европын аюулгүй байдал, хамтын ажиллагааны байгууллагын Ерөнхий нарийн бичгийн дарга Томас Гремингертэй уулзсан тухай тус яамны хэвлэлд бичсэн байна.
Уулзалтаар талууд авлигатай тэмцэхтэй холбоотой олон асуудлын талаар ярилцжээ.
Дэд сайд Крмоян тус улсын эрх бүхий шинэ байгууллагууд авлигатай тэмцэхэд бэлэн байгаа, Армени улсын Засгийн газраас хэрэгжүүлж буй авлигын эсрэг хөтөлбөрт олон нийтийн дэмжлэг шаардлагатай байгаа тухай дурдсан байна.
Түүнчлэн, Засгийн газраас хэрэгжүүлж буй авлигын эсрэг хөтөлбөрийн хэрэгжилтэд шаардлагатай байгаа туслалцааны талаар дурдаад ЕАБХАБ-тай хамтран хэрэгжүүлэх арга хэмжээний тухай хэлэлцээр байгуулан, авлигын гэмт хэрэгтэй тэмцэх ажилд үр нөлөөтэй байлгах талаар судлах юм байна. ЕАБХАБ-ын Нарийн бичгийн дарга Армени улсад өрнөж буй үйл явдлуудыг сайшаагаад, цаашдын шинэчлэлийн ажилд оролцон, авлигатай тэмцэх үйл хэрэгт сайн үр дүн гаргахад нь дэмжлэг үзүүлэх сонирхолтой байгаагаа илэрхийлжээ.