Дани улсын Копенхаген хотод зохион байгуулагдаж буй Авлигын эсрэг олон улсын хурлын үеэр авлигатай тэмцэх салбарын 2018 оны шагналтнуудыг Транспарэнси Интернашэнл байгууллага зарласан байна.
“Тууштай, зоригтой ажиллаж, авлигатай тэмцэж болдог гэдгийг хүчтэй дуу хоолойгоороо бусдад харуулсан гурван хүн, нэг байгууллагад авлигатай тэмцэх салбарын 2018 оны шагналыг хүртээж байна. Шударга бус явдлын эсрэг тэмцэж, аюул, дарамтад байсан энэ хүмүүс маш их зүйлийг ярина” гэж шагнал гардуулах үеэр Транспарэнси Интернашэнл байгууллагын Авлигатай тэмцэх салбарын шагналын хороо, Удирдах зөвлөлийн гишүүн Борис Дивжак хэлжээ. Ингээд Малта улс болон бусад улс орны нөлөө бүхий улс төрчдийн авлигын томоохон хэргийг илрүүлсэн боловч харамсалтайгаар бусдад амиа алдсан зоригтой сэтгүүлч Дапиа Гализиад, Гуатемала улсын Ял завших явдалтай тэмцэх олон улсын хорооны дарга Иван Велакюзид, Азербайжан улсад хүний эрхийн төлөө тэмцэгч, эрэн сурвалжлах сэтгүүлч Хадияа Исмаяловад, Испани улсын Засгийн газартай холбоотой хэргийн талаар мэдээлэгч Ана Рамос нарт шагнал олгосон байна. Уг шагналд 169 хувь хүн, байгууллага нэр дэвшсэнээс 4 хүн ийнхүү хүртжээ.
Анх шударга ёсны шагнал гэж 2000 онд эхэлж байсныг 2016 онд Авлигатай тэмцэх салбарын шагнал болгон өөрчилж байсан түүхтэй бөгөөд энэ хүндэт шагналыг хувь хүн, байгууллага, сэтгүүлч, прокурор, төрийн албан хаагч, иргэний нийгмийн төлөөлөлд олгодог юм байна.
Эх сурвалж
Шинэ технологийг ашиглан авлигатай тэмцэх боломжтой
Авлига нь дэвшил, энх тайван, тэр дундаа ядууст илүү хор хөнөөлтэй байдаг хэдий ч шинэ технологийг ашиглан авлигатай тэмцэх бүрэн боломжтой гэж НҮБ-ын Хөгжлийн хөтөлбөрийн дарга Копенхаген хотод болсон хурлын үеэр хэлсэн байна. Дани улсын Копенхаген хотод болж буй Авлигын эсрэг олон улсын хурал дээр “Авлигын улмаас иргэд төрийн байгууллагад итгэл алдарч, нийгмийн тэнцвэртэй байдал алдагдаж, энх тайвны байдалд сөргөөр нөлөөлдөг. Хэрэв шинэ технологийг зөв ашиглавал шинэ үеийнхэнд нээлттэй, олон нийтийн оролцоотой засаглалыг бий болгож өгнө” гэж тэр хэлжээ. Хөгжиж буй дэлхий ертөнц хууль бус санхүүгийн гүйлгээний улмаас 2013 онд 1,1 их наяд ам.долларыг алдсан тоо байдаг байна. Мөн хахуульд жил бүр 1,5 их наяд ам.долларыг төлдөг ажээ. Үүнийг авч үзвэл, хөгжилтэй улс орнуудын тусламжийн хэлбэрээр шилжүүлсэн мөнгийг 10 доллар гэж үзвэл түүнээс зөвхөн 1 доллар нь л тусламжид очдог байна. Тиймээс хөгжил дэвшилд зориулагдах байсан хөрөнгө авлига болж хувираад, тусламж авах ёстой тэр хүмүүст хүрч чадахгүй болж байна гэж нэмж хэлсэн байна.
Түүнчлэн НҮБ-ын Хөгжлийн хөтөлбөр шинэ технологийг ашиглан хариуцлага, ил тод байдлыг нэмэгдүүлэхээр ажиллаж байна. Тухайлбал, Сьерра Лион улсын Фритаун хотын цахим дүрслэлийг бий болгосноор цаасан дээр бүртгэлтэй байсан 2000 байшинг 200,000 байгааг олж мэдсэн, мөн Гүүгл компанитай хамтран тогтвортой хөгжлийн зорилтуудтай холбоотой дэд бүтцийн төслүүдийг цахимаар хянах замаар авлигыг бууруулж байна. “2030 оны хөтөлбөр болон Тогтвортой хөгжлийн зорилтуудад хүрэхийн тулд авлигатай зайлшгүй тэмцэх шаардлагатай бөгөөд энэ бүхэн иргэдийн хэрэгцээ шаардлагад нийцсэн төрийн сайн байгууллагуудаас шалтгаална” гэж хэлжээ.
