Индонез улсын Нэгдсэн хөгжлийн намын дарга М.Ромахурмузийг 3 дугаар сарын 15-нд баривчилсан нь тус улсын Шашны харилцааны яамтай холбоотой ээлжит таагүй үйл явдлын нэг болов. Өнгөрсөн хугацаанд тус яамны хоёр ч сайд авлигын хэргээр хоригдох ял авсан юм.
2005 онд шашны өвийн сангаас 719 тэрбум Индонез рупи (73.5 сая ам.доллар)-ийг завшсан хэргээр сайдаар ажиллаж байсан Саид Агил Ал Мунаварт таван жилийн хорих ял оноосон бол 2016 онд Жакартагийн Авлигын хэргийг хянан шийдвэрлэх шүүх Нэгдсэн хөгжлийн намыг М.Ромахурмузигийн өмнөхөн даргалж байсан Суриядарма Алиг эрх мэдлээ урвуулан ашиглаж, тус яамны үйл ажиллагааны зардал, мөн шашны өвийн санд их хэмжээний хохирол учруулсныг тогтоон зургаан жилийн хорих ял оноосон байна.
Ноён Ромахурмузийг Индонезийн ууган Ислам шашны намын даргын хувьд өөрийн эрх мэдэл, нөлөөг ашиглан Шашны харилцааны яамны зүүн бүсийг хариуцсан өндөр албан тушаалд Муафак Вирахади, Харис Хасанудин томилуулахаар тохиролцон, 300 сая рупийг хахуульд авсан хэмээн баривчилжээ.
Эх сурвалж
Спортын од авлигын хэрэгт буруутгагдав
АНУ-ын Үндэсний сагсан бөмбөгийн холбооны хуучин од Чак Пэрсон Аубурнийн Их сургуулийн сагсан бөмбөгийн туслах дасгалжуулагчаар ажиллаж байхдаа 91,500 ам.долларыг хахуульд авсан хэмээн буруутгагджээ.
Холбооны мөрдөх товчооноос их сургууль, коллежуудын сагсан бөмбөгтэй холбоотой авлигын хэргээр хэд хэдэн дасгалжуулагчдыг баривчилсны нэг нь өдгөө 54 настай, ҮСБХ-нд 13 жил од болон гялалзсан Чак байв. Түүнийг санхүүгийн зөвлөхөөс авлига авч, хариуд нь өөрийн нөлөөг ашиглан тоглогчдын мэргэжлийн сагсан бөмбөгийн ертөнц дэх карьерийг “удирддаг” хэмээжээ.
Нью-Йорк хотын өмнөд тойргийн прокурор Жофри Бэрман мэдэгдэлдээ “Чак Пэрсон нь дасгалжуулагчийн албан тушаалын эрх мэдлээ ашиглан хууль бусаар хөрөнгөжсөн, түүнийгээ ч хүлээн зөвшөөрсөн” гэжээ.
Аубурнийн Их сургууль түүнийг ажлаас халж, шүүх хурал нь 6 дугаар сарын 9-нд товлогдсон бол түүний хийсэн хууль бус үйлдэл нь 5 хүртэл жилийн хорих ялтай юм.
АНУ дахь их сургууль, коллежуудын сагсан бөмбөгийн бизнест жилдээ хэдэн тэрбумаар хэмжигдэх ам.долларын эргэлт үүсдэг бөгөөд дээрхи хэрэг явдалтай холбоотойгоор өөр гурван туслах дасгалжуулагчдыг гэм буруутай гэж үзэж байгаа билээ.