Авлигын хэрэгт холбогдсон этгээдүүдтэй шүүхийн шатнаас өмнө тохиролцоо хийх замаар Саудын Арабын эрх бүхий байгууллага 106 тэрбум ам.долларыг эргүүлэн авч чадсан байна.
“Хэрэгт холбогдуулан 381 хүнийг шалгаж, тэднээс 56 хүнийг авлигын эсрэг кампанит ажлынхаа хүрээнд баривчлан саатуулсан бөгөөд тохиролцоогүй бусад хүмүүсийн хэргийг шүүхэд шилжүүлсэн” гэж тус улсын Прокурорын байгууллага мэдээлжээ.
Хэвлэл мэдээллийнхний мэдээлснээр, Эр-Рияд хот дахь “Ритз-Карлтон” зочид буудалд хоригдсон бүх хүнийг өнгөрсөн мягмар гарагт сулласан бөгөөд зочид буудал нь 2018 оны 2 дугаар сарын 14-ний өдрөөс эхлэн урьдын адил үйл ажиллагаагаа хэвийн явуулж эхлэх юм байна.
Эрх бүхий байгууллага төрийн өндөр албан тушаалтнуудад холбогдох хэргүүдийг хянан шалгах ажиллагаа явуулж, 1 дүгээр сарын 24-нд дуусгасан гэж мэдээлсэн бөгөөд хэрэгт холбогдсон хүмүүсийн дийлэнх нь шүүхийн өмнөх шатанд тохиролцоо хийсэн байна.
Эх сурвалж
Малайзын Авлигын эсрэг хороо 1,1 сая ам.доллар бүхий 13 дансыг битүүмжилжээ
Малайзын Авлигын эсрэг хороо шалгалт явуулж, тус улсын Ус сувгийн газрын дарга, хоёр компанийн захиралыг баривчилж, тэдний эзэмшдэг 1,1 сая ам.доллартой дансыг битүүмжилсэн байна.
Тэдгээр дансыг тус газрын дарга, түүний хүүхдүүд болон компанийн захирал эзэмшдэг юм байна. Цаашид энэ хэргийг үргэлжлүүлэн шалгаж, уг хэрэгт нэмж хэн нэгнийг татаж магадгүй гэж Малайзын Авлигын эсрэг хорооны дарга мэдээлжээ.
Түүнчлэн, Малайзын Авлигын эсрэг хороо хэрэгт холбогдсон компанийн эзэмшигчийн гэрээс нь бэлэн 230 мянган ам.доллар хурааж, түүний дансан дахь 740 мянган ам.долларыг битүүмжилжээ.
Тус байгууллагын дарга нь 2014-2017 оны хооронд тендер зарлан явуулж, тендер бүрийн үнийн дүнгээс 10 хувийг хахуульд авдаг байсан гэх авлигын хэрэгт шалгагдаж байгаа юм байна. Харин компанийн захирлуудын хувьд уг хэрэгт хамтран оролцсон байж болзошгүй гэж үзэн шалгагдаж байгаа аж.
