Авлигын эсрэг хуулийн 26 дугаар зүйлийн 26.1-д “Улсын Их Хурал авлигатай тэмцэх хууль тогтоомжийн хэрэгжилт, авлигын ерөнхий нөхцөл байдлын талаар Авлигатай тэмцэх газрын мэдээллийг жил бүр мэдээлнэ” гэж заасны дагуу “Монгол Улсын авлигатай тэмцэх хууль тогтоомжийн хэрэгжилт, авлигын ерөнхий нөхцөл байдал”-ын талаарх мэдээллийг байгууллагын хэлтэс, албадын үйл ажиллагааны тайлан, гадаад, дотоодын авлигын талаарх судалгааны үр дүнгийн хүрээнд боловсруулан, хэвлэж, Улсын Их Хуралд хүргүүлэв.
Тайлангийн хугацаанд нийтийн албан тушаалтнуудын 2013 оны хувийн ашиг сонирхлын мэдүүлэг болон хөрөнгө, орлогын мэдүүлгийг шинэчлэн бүртгэсэн тойм мэдээ болон бүрдүүлэлтийн тайлангийн нэгдсэн дүнгийн талаарх мэдээллийг Үндэсний аюулгүй байдлын зөвлөл, Улсын Их Хурлын Хууль зүйн байнгын хороонд тус тус хүргүүлэв.
Хяналт шалгалтын албаны хэмжээнд хувийн ашиг сонирхлын мэдүүлэг болон хөрөнгө, орлогын мэдүүлгийн хяналт шалгалтын нэгдсэн бүртгэлийг ажилтан тус бүрээр хөтөлж, хяналт шалгалтын ажлын ачаалал, хугацаа, үр дүнд хяналт тавьж ажилласан. Албаны хэмжээнд 2014 онд нийт 561 албан тушаалтны хувийн ашиг сонирхлын мэдүүлэг болон хөрөнгө, орлогын мэдүүлгийг хянан шалгахаас 450 мэдүүлгийг шалгаж дууссан ба улирлын эцэст 111 албан тушаалтны мэдүүлгийг шалгаж байна.
Авлигатай тэмцэх газарт 2013 оны хувийн ашиг сонирхлын мэдүүлэг болон хөрөнгө, орлогын мэдүүлгээ мэдүүлбэл зохих 266 мэдүүлэг гаргагч 100% мэдүүлгээ гаргаж бүртгүүлсэн. 2014 онд шинээр 24 албан тушаалтан томилогдсон бол Авлигын эсрэг хуульд орсон 2014 оны 01 дүгээр сарын 24-ний өдрийн нэмэлт өөрчлөлтөөр 11 мэдүүлэг гаргагч хуулийн үйлчлэлд шинээр нэмэгдэж, 22 албан тушаалтан их хэмжээний өөрчлөлтөө бүртгүүлсэн.
Авлигатай тэмцэх газар олон нийтийн оролцоонд тулгуурласан, хөндлөнгийн хараат бус “Шинжээчдийн баг”-ийг ажиллуулж, төрийн байгууллагын авлигын эсрэг 2014 оны үйл ажиллагаанд үнэлгээ хийлгэсэн билээ. Уг үнэлгээний дүнг олон нийтэд танилцууллаа.