Олон улсын валютын сан Малайзын Улсын авлигатай тэмцэх туршлагаас судлах сонирхолтой байна гэж тус сангийн тэргүүн Кристин Лагарде хэлжээ.
Украйн Улс жилд дотоодын нийт бүтээгдэхүүнийхээ 2 хувийг авлигын улмаас алдаж байна гэсэн мэдээллийг Олон улсын валютын сангийн төлөөлөгч хэвлэлийнхэнд өгсөн байна.
Малайз Улсад авлигын нөхцөл байдал улам бүр хүндэрч байна гэж тус улсын Авлигын эсрэг хорооны дарга Сери Мохд Шукри Абдул мэдэгдсэн байна.
Филиппин Улсын Ерөнхийлөгч асны эхнэр 89 настай Имелда Маркос 7 үйлдэлтэй авлигын хэрэгт буруутай нь тогтоогдлоо. Тэрээр авлигын үйлдэл бүртээ 6-11 жилийн хорих ял сонсчээ. Түүний 1968-1986 онд тэргүүн хатагтай байхдаа Швейцарь улсад байгуулсан хувийн сантай нь холбогдох хэргийг 20 жилийн турш шалгасны эцэст шүүхээс дээрх шийдвэрийг гаргасан байна.
Өмнөд Африкийн хууль сахиулах байгууллагууд Дани Улсын иргэнийг Данийн Эрүүл мэндийн үндэсний удирдах зөвлөлийн хөрөнгөөс 17 сая ам долларыг шамшигдуулсан хэрэгт холбогдуулан баривчилсан байна.
Румын улсын Авлигын эсрэг прокурорын удирдах газраас Их хурлын дарга Калин Попеску Тарикеанугийн халдашгүй дархан эрхийг нь түдгэлзүүлэх асуудлыг Их хуралд оруулж ирсэн байна. Дархан эрхийг нь түдгэлзүүлснээр түүнийг Австрийн компаниас 800,000 ам долларын хахууль авсан эсэхийг нь нарийвчлан мөрдөн шалгаж, шийдвэрлэх боломжтой болох ажээ.
Бразилийн Ерөнхийлөгчөөр сонгогдсон Жаир Болсонару авлигатай эрчимтэй тэмцэнэ гэдгээ мэдэгдээд Хууль зүйн сайдаар авлигын хэрэг хянан шийдвэрлэдэг шүүгчээр өмнө нь ажиллаж байсан Серхио Морог томилно гэсэн байна.
БНХАУ-д зохион байгуулалттай гэмт хэрэгтэй тэмцэх эхний шатны ажиллагааны хүрээнд өнгөрсөн 10 дугаар сард 572 хүнийг авлигын хэрэгт татан, хариуцлага хүлээлгэсэн байна.
Өвөр Монголын өөртөө засах орны Цагдаагийн ерөнхий газрын удирдах түвшний хоёр албан тушаалтан авлигын хэрэгт холбогдсоны дараа тэдэнтэй хамт ажилладаг байсан, тус орны Цагдаагийн ерөнхий газрын орлогч дарга бөгөөд Хөх хотын Цагдаагийн газрын дарга Ли Зибин өнгөрсөн пүрэв гарагт амиа хорлосон байна.
Хонгконгийн Авлигын эсрэг бие даасан хорооны Мөрдөн шалгах хэлтсийн дарга Рикки Юу Чун-чеон 39 жилийн турш тус хороонд ажилласан бөгөөд 11 дүгээр сарын 2-ны өдрөөс өөрийн орлогч Эрик Тон Вин-такт ажлаа хүлээлгэн өгөх гэж байна. “Би хэнээс ч үүнийг хий, эсвэл битгий хий гэсэн тушаал сонсож байгаагүй” гэж тэр хэлжээ.