Авлигын хэргийн гол сэжигтнийг Испани Улсаас баривчлав
Испани Улс 11.22.2016 (BBC). Испанийн цагдаагийн байгууллага Испани, Бразилийн иргэншилтэй 43 настай эрэгтэйг Мадрид хотын нэгэн зочид буудлаас баривчилжээ. Тэрээр Бразилийн барилгын Одебрехт компанийн хуулийн зөвлөхөөр ажиллаж байжээ. Түүнийг төрийн өмчийн газрын тосны Петробас компанийн авлигын схемийг зохион байгуулсан хэмээн сэжиглэж байгаа аж. Төсвийн хөрөнгөөр зарлагдаж буй тендерт улс төрчдийг хахуульдаж санхүүгийн тааламжтай гэрээ хэлцэл хийж байсан авлигын схемийг шалгах ажлыг “Машин угаалга” хэмээн нэрлэсэн юм. Эхлээд Петробас компанийг шалгаж байсан бол сүүлдээ хээл хахуулийн сүлжээнд автсан олон компаниудыг хамруулав. Үүний нэг нь Латин америкийн томоохон барилгын компанид тооцогдох Одебрехт юм. Одебрехт компанийн захирал Марсело Одебрехт-д мөнгө угаасан, хээл хахууль өгсөн хэрэгт холбогдуулан 19 жилийн ял оноосон байна.
Кенийн албан тушаалтыг авлигын хэрэгт холбогдуулан цагдаагийн байгууллага саатуулав
Кени Улс 11.22.2016 (The Gardian). Кенийн усан сэлэлтийн холбооны Ерөнхийлөгч Бен Экумбо-г тус улсаас 2016 оны Риогийн олимпиадад оролцох тамирчдад зориулсан хөрөнгөнөөс завшсан хэрэгт холбогдуулан саатуулсан байна. Экумбо нь Усан сэлэлтийн холбооны Ерөнхийлөгчөөс гадна тэрээр Кени Улсын Олимпийн хорооны Дэд Ерөнхийлөгч бөгөөд тамирчдад зориулсан хөрөнгө шамшигдуулсантай холбоотой саатулагдсан тав дахь төрийн өндөр албан тушаалтан юм.
Малайзийн Авлигын эсрэг комисс гурван хүнийг баривчлаад байна
Куала-Лумпур 11.21.2016 (Malasiakini). Албан тушаалын байдлаа урвуулан ашиглах, хээл хахууль авах гэмт хэрэгтэй холбогдуулан Лабуан мужид гурван хүн баривчилснаа Малайзийн Авлигын эсрэг комиссын Путражая салбарынхан өнөөдөр мэдэгдэв.
ОХУ-д авлигатай тэмцэх ажлыг эрчимжүүлэх чиглэлээр Европын зөвлөлөөс өгсөн зөвлөмжийн ихэнхийг биелүүлжээ
ОХУ 11.20.2016 (РБК). Авлигатай тэмцэх Европын зөвлөлөөс ОХУ-д өгсөн зөвлөмжийн арван нэгийг бүрэн арван зөвлөмжийг хэсэгчлэн биелүүлсэн байна хэмээн ОХУ-ын авлигатай тэмцэх үндэсний бодлогод үнэлгээ өгөх ажлын хэсгийнхэн дүгнэжээ. 2014 онд ОХУ зөвхөн гурван зөвлөмжийг биелүүлсэн байсан бол 2016 онд ахиц гарсан хэмээн тайланд дурджээ. Тухайлбал, шүүгч болон олон улсын парламентын гишүүнд хээл хахууль өгөх явдлыг эрүүгийн гэмт хэрэгт тооцох, хээл хахуулийг тодорхойлолтыг өргөн хүрээнд томьёолох, сонгуулийн санхүүжилтийн хууль тогтоомжид өөрчлөлт оруулах, улс төрийн намын авч буй мөнгөн бус хандив, зээл зэргийг хянах эрх зүйн зохицуулалтыг сайжруулсан байна.
Ерөнхийлөгч Пак Гын Хэ-ийн авлигын хэргийг шалгахаар Солонгос Улс хууль батлав
БНСУ 2016.11.17 (The Star). Ерөнхийлөгч Пак Гын Хэ-ийн авлигын хэргийг тусгай прокуророор шалгуулахыг зөвшөөрсөн хуулийг Өмнөд Солонгосын Парламент батлаад байна. Тусгай прокуророор шалгуулах тухай хуулийг 300 суудалтай парламентийн гишүүдийн 196 нь дэмжсэнээр батлагдсан юм.
Эрэн сурвалжлагдаж байсан этгээдийг 13 жилийн дараа нутагт нь авчрав
БНХАУ 2016.11.16 (Reuters). Хятад Улсаас авлигын хэрэгт сэжиглэн хамгийн ихээр эрэн сурвалжилж байсан этгээдээ АНУ-аас эх оронд нь энэ Лхагва гарагт буцаан авчраад байна. Энэхүү ажиллагаа нь оргодол албан тушаалтнуудыг хилийн чанадаас авчрах оролдлого хийж буй Хятадын Коммунист намын томоохон ялалт болоод байна.
Европ, төв Азид авлигатай тэмцэх чиглэлээр Засгийн газрууд хангалттай ажиллахгүй байна
Транспэрэнси интернэшнл 2016.11.16 (ТИ). Европ, төв Азийн 42 улсын 60,000 орчим иргэдээс тэдний өдөр тутмын амьдрал дахь авлигын талаар судалсан “Хүмүүс ба Авлига: Европ, төв Ази” гэсэн гарчиг бүхий шинэ судалгааны тайланг Транспэрэнси интернэшнл байгууллагаас гаргаад байна.
Авлигын хэргээр 2014 оноос хойш 1000 гаруй төрийн албан хаагчийг баривчилсан
Малайз 2016.11.07 (The Malay Mail Online). Малайзын Авлигатай тэмцэх хороо 2014 оноос энэ оны 9 сар хүртэлх хугацаанд авлигын хэрэгт холбогдуулан Засгийн газрын яам, агентлагуудаас нийтдээ 1037 хүнийг баривчилсан байна.
Авлигын хэрэгт холбоотойгоор Ерөнхийлөгч Пакаас Өмнөд Солонгосын прокурорууд тайлбар авна
БНСУ 2016.11.13 (VOA news). Олон нийтийн зүгээс Ерөнхийлөгч Пак Гын Хэ-г албан тушаалаа өгөхийг шаардахад хүргэсэн, Ерөнхийлөгчийн үйл ажиллагаанд саад учруулсан авлигын хэрэгт холбоотойгоор Өмнөд Солонгосын прокурорууд Ерөнхийлөгчөөсөө тайлбар авч магадгүй болоод байна.
Хятадын шүүхээс хээл хахуулийн хэргээр дэд сайд асанд 4 жилийн ял оногдууллаа
БНХАУ 2016.11.10 (JURIST). Хээл хахуульд 2.4 сая юань (354,000.58 ам. доллар) авсан хэрэгт буруутгагдаад байсан Хятадын дэд сайд асан Жан Лию-г Лхагва гарагт буруутай болохыг нь тогтоож 4 жилийн ял оногдуулаад байна.
